गृहमन्त्री सुधन गुरुङले ब्रेकफास्टका क्रममा खाएको अम्लेटमा माछाको काँडा भेटिएको घटना सेलाउन नपाउँदै अर्काे एक होटलमा समेत यस्तै लापरवाही भएको घटना सार्वजनिक भएको छ । केही दिन अगाडिमात्र भरतपुर विमानस्थल अगाडि रहेको होटल लड्र्स बिजनेस कम्प्लेक्स प्रालिमा गृहमन्त्रीले ब्रेकफास्ट गर्ने क्रममा अम्लेटमा माछाको काँडा भेटिएको थियो । होटलको यो लापरबाही उपभोक्ता संरक्षण ऐन, २०७५ को दफा १६ को उपदफा २ को खण्ड (क) तथा सोही ऐनको दफा ३८ को खण्ड (ङ) विपरीतको कसुर ठहरिएको छ । तत्कालै सो होटललाई ३ लाख रुपैयाँ जरिवाना तिराइएको थियो ।

सोही प्रकरण साम्य नहुँदै बर्दघाट २ चिसापानीमा रहेको रोयल कटेजमा समेत खानामा शंखेकिरा भेटिएको छ । सहायक सीडीओ पोषणराज भण्डारीले खाना खाने क्रममा सागमा सङ्खे कीरा भेटिएको पाइएपछि उक्त कटेजलाई ५० हजार जरिवाना गरिएको छ । बर्दघाट नगरपालिकाका वडामा बालमैत्री घोषणाका लागि अनुगमनमा पुगेको सहायक सिडिओ नेतृत्वको टोली उक्त होटलमा खाना खान पुगेको थियो ।